Irish Coffee
Страва, якая стала візытнай карткай ірляндскай кухні, — Irish Coffee, або кава па-ірляндску, — зьявілася адносна нядаўна. У 1952 годзе сваім фірмовым напоем — кава з віскі — бармэн Джо Шэрыдан частаваў знаёмага журналіста з Сан-Францыска. Той, вярнуўшыся дадому, падзяліўся рэцэптам са сваім прыяцелем, які ўтрымліваў бар «Буэна Віста». У вельмі кароткі тэрмін напой стаў ня проста вядомым, а культавым. Сёння ў «Буэна Віста» штогод прадаюць па паўмільёны куфляў кавы па-ірляндску.
Інгрэдыенты:
* 4 сл (4cl – 2 часткі) ірлядскага віскі
* 8 сл (8cl – 4 часткі) гарачай кавы
* 3 сл (3cl – 1,5 часткі) сьвежых вяршкоў
* 1 ч. л. трысьняговага цукру
Як гатаваць:
1. У прагрэты шкляны куфаль пакласьці 1 ч. л. трысьняговага цукру, уліць 40 мл таксама разагрэтага ірляндскага віскі, зьмяшаць.
2. Уліць сьвежапрыгатаваную ў гейзэрнай кававарцы каву, зьверху выкласьці ўзбітыя вяршкі.
Зазначым, што для Irish Coffee патрабуюцца адмысловыя куфлі з загартаванага шкла, якое практычна не награваецца, таму руку вы не абпаліце. Далей, гэта абавязкова мусіць быць ірляндскі віскі, а не бурбон або скотч, бо толькі мякькі ірляндскі віскі спалучаецца з кавай, у то час як шатляндскі — з чорнай гарбатай. Некаторыя ўпадабаюць у гэтым рэцэпце ванільныя вяршкі.
* Рэцэпт Ірляндскай кавы паводле Міжнароднай асацыяцыі бармэнаў (International Bartenders Association, IBA)
brown sugar, cocktail, coffee, cream, IBA, Irish Coffee, Irish whiskeys, recipe